O IES Nº 1 está de noraboa. O luns 31 de maio , tivemos a honra de recibir a visita de Dona Emilia Pardo Bazán. Como muller enérxica e traballadora que sempre foi , presentouse no centro á primeira hora da mañá. Viña acompañada polo Excmo. alcalde do concello de " Vilamorta " que, como xa sabedes case todos, foi o alcume que Emilia Pardo Bazán lle puxo ó Carballiño. E non só lle puxo ese alcume, se non que tamén escribiu unha novela que leva por título : " El Cisne de Vilamorta ", cuxa acción se desenvolve no Carballiño e a súa comarca. Non vou falar dende o punto de vista literario da novela, pero sí de tantos lugares que aparecen na mesma e que resultan tan familiares para os que nacemos e vivimos no Carballiño: o río, o balneario, as casas de pedra con solaina da praza maior, as festas do setembro, as vendimas.. de todo iso fala Dona Emilia no libro, xa que ela casara cun fidalgo carballiñés, José Quiroga, e pasaba boa parte do verán entre o pazo de Banga e a fermosísima casa da Praza Maior. Despois de visitar ós rapaces-as de 4ª de ESO, como non podía ser doutro xeito, a Pardo Bazán quixo visitar a Biblioteca . Con todo isto fixemos unha pequena reportaxe que vos deixamos ao comenzo desta entrada.
Como xa sabedes, no 2021 se cumpren 100 anos do pasamento de Emilia Pardo Bazán. Estas imaxes que vos deixamos aquí forman parte dos actos do centenario que se están levando á cabo por parte do Concello do Carballiño e que incluíu esta " performance " da visita da Pardo Bazán ó IES Nº 1. Grazas os actores ( Dona Emilia e o Alcalde ) porque estiveron moi convincentes. A actuación levouse á cabo nos tres cursos de 4º de ESO, xa que foron estes alumnos os que leron e comentaron o libro coa profesora de Língua e Literatura Española : Carmen Hernández Castejón.
