Este ano, por mor da pandemia , será a primeira vez en dez anos que fallemos na cita de " Bibliotecas na Rúa ", evento que dende o ano 2011 se ven celebrando na Praza Maior do Carballiño, onde participamos prácticamente todos os centros educativos da vila para conmemorar O Día Internacional do Libro. Nunca fallamos, aínda que chovera, para iso temos os soportais da Rúa Principal que o mesmo serven se chove como se vai moito calor.
Hoxe tería sido unha boa xornada, xa que a tarde é calurosa e despexada, pero haberá máis tardes e máis días..
Porque iso é o bó de ler : que nos permite facelo a calquera momento, calquera día e en calquera lugar. Coa lectura abrimos fiestras a mundos descoñecidos, vivimos múltiples historias e coñecemos outros xeitos de entender o mundo, pero tamén nos atopamos a nós mesmos e nos sentimos máis acompañados.
Á beira do mar, baixo as árbores dun parque ( qué ledicia !! ) ou circunstancialmente confinados nas casas ( agás os que teñan xardín. Qué envexa !! ).
Hoxe lin que por mor do Covid-19, aumentou a lectura en soporte dixital un 50%, e non me parece mal, porque os distintos soportes sexan dixitais ou en papel , son só medios para que non nos esquezamos de ler, que é o que realmente importa. Pero tamén agardo que cando se levante o estado de alarma sigamos acudindo ás librarías a mercar libros como sei que vindes facendo moitos de vós durante todo o ano.
Ao longo da vida, son as distintas circunstancias e vivenzas as que van determiñando o nosos carácter, pero tamén os libros nos acompañan nesta travesía, de tal xeito, que todos nós rematamos sendo o que lemos. Todas esas portas que con cada libro se nos van abrindo. E non só aprendemos dos bos libros, senón tamén daqueles que non puidemos rematar, todos van deixando algunha pegada.
Hoxe, case todas as edicións dixitais dos xornais traen interesantes guías de lectura. Neste blogue, hai algunha entrada anterior con enderezos a Plataformas de Lectura moi interesantes para ler. O máis importante é ter curiosidade e gañas de abrir a mente e seguir aprendendo. Todo alimenta na lectura: a poesía, as novelas de distinta temática, mesmo ensaios sobre ciencia, historia, filosofía, etc..
Eu penso que tamén lemos para nos estar sós e para ser mellores.
FELIZ DIA DO LIBRO E A SEGUIR LENDO TODO O ANO COMO SE FOSE ABRIL !!
